Parish News

ರಾಮಾಚ್ಯಾ ಆಯ್ತಾರಾ ಆರಂಭ್ ಜಾಲ್ಲೊ ಬಾಗೆವಂತ್ ಹಫ್ತೊ, ಜೆಜುಚ್ಯಾ ಪುನರ್ ಜಿವಂತ್ಪಣಾಂತ್ ಅಖೇರ್ ಜಾತಾ. ಹಾಚ್ಯಾ ಮಧೆಂ ನಿಮಾಣೊ  ಬ್ರೆಸ್ತಾರ್ ಆನಿ ನಿಮಾಣ್ಯಾ ಸುಕ್ರಾರಾ ಜೆಜುಚಿ ಖುರ್ಸಾಚಿ ವಾಟ್ ಆನಿ ತಾಣೆ ಸೊಸ್ಚೆ ಕಷ್ಟ್ ನಿಯಾಳುನ್, ಜೆಜುಚ್ಯಾ ಮರ್ಣಾ ವರ್ವಿಂ ಮೌನ್ ಪಡ್‍ಲ್ಲಿ ಪವಿತ್ರ್ ಸಭಾ ಜೆಜುಚ್ಯಾ ಪುನರ್ ಜಿವಂತ್ಪಣಾಂತ್ ಪರತ್ ಸಂಭ್ರಮುನ್ ಆಸಾ.

ಆಮ್ಚ್ಯಾ ಫಿರ್ಗಜೆಂತ್ ಜೆಜುಚ್ಯಾ ಜಿವಂತ್ಪಣಾಚಿ ಪರಬ್ ಭೋವ್ ಗಡ್ದಾಳಾಯೆನ್ ಆನಿ ಭಕ್ತಿಪಣಿ ಆಚರಣ್ ಕೆಲಿ. 31.03.2018 ಸನ್ವಾರಾ ಸಾಂಜೆರ್ 7.30 ವರಾಂಕ್ ಪಾಸ್ಕಾಚಿ ಲಿತುರ್ಜಿ ಆರಂಭ್ ಜಾಲಿ. ಸುರ್ವೆರ್ ಸಭಾ ಸಾಲಾಚ್ಯಾ ಮೈದಾನಾರ್ ಉಜೊ ಬೆಂಜಾರ್ ಕರ್ಚ್ಯಾ ಮುಖಾಂತ್ರ್ ಕಾಳೊಕಾ ವರ್ಯ್ ಉಜ್ವಾಡಾನ್ ವೆಲ್ಲ್ಯಾ ಜಯ್ತಾಚಿ ನಿಶಾನಿ ಜಾವ್ನಾಸ್ಚ್ಯಾ ಉಜ್ಯಾಂತ್, ಪವಿತ್ರ್ ಕೆಲ್ಲಿ ಪಾಸ್ಕಾಚಿ ವಾತ್ ಪೆಟಯ್ಲಿ. ಮಿಸಾರ್ ಪ್ರಧಾನ್ ಯಾಜಾಕ್ ಜಾವ್ನ್ ಕಾಪುಚಿನ್ ಪ್ರಾದ್ ಬಾಪ್ ಮ್ಯಾಕ್ಸಿಂ ಡಿ’ಸಿಲ್ವಾ ಹಾಜಾರ್ ಆಸ್‍ಲ್ಲೆ. ಜೆಜುಚ್ಯಾ ಜಿವತ್ಪಣಾನ್ ನವೊ ಭೊರ್ವೊಸೊ ಉದೆಲಾ, ತ್ಯಾ ಜಿವಂತ್ ಜೆಜುಚ್ಯಾ ಪಾವ್ಲಾನಿಂ ಆಮಿ ಚಲ್ಯಾಂ ಮುಳ್ಳೊ ಉಲೊ ಆಪ್ಲ್ಯಾ ಪ್ರಸಂಗಾತ್ ಮಾನಾದಿಕ್ ಬಾಪಾನಿ ದಿಲೊ. ಫಿರ್ಗಜ್ ವಿಗಾರ್ ಮಾ. ಬಾ. ಜೆಸುದಾಸ್ ಡಿ’ಕೋಸ್ತಾ ಹಾಣಿಂ ಸಹಭೆಟವ್ಣಿ ಕೆಲಿ. ಸರ್ವಾನಿಂ ಭೋವ್ ಭಕ್ತಿಪಣಿಂ ಸಂಪೂರ್ಣ್ ಲಿತುರ್ಜಿಂತ್ ಭಾಗ್ ಘೆತ್ಲೊ. ಗಾಯಾನ್ ಮಂಡಳೆನ್ ಅರ್ಥಾಭರಿತ್ ಗಾಯಾನಾಂ ಕರುನ್ ಭಕ್ತಿಪಣ್ ಚಡಯ್ಲೆಂ. ಮಿಸಾಚ್ಯಾ ಅಖೇರಿಕ್ ವಿಗಾರ್ ಬಾಪಾನಿಂ ಭಾಗೆವಂತ್ ಹಪ್ತ್ಯಾಂತ್ ಸೆವಾ ದಿಲ್ಲ್ಯಾ ಸರ್ವಾಂಚೊ ಉಪ್ಕಾರ್ ಭಾವುಡ್ಲೊ.

ಮಿಸಾ ಉಪ್ರಾಂತ್ ಹರ್ಯೆಕ್ಲ್ಯಾನಿ ಎಕಾಮೆಕಾ ಫೆಸ್ತಾಚೆ ಶುಭಾಷಯ್ ಪಾಟಯ್ಲೆ. ಮಿಸಾ ಉಪ್ರಾಂತ್ ಸಾಂ ಜುಜೆ ವಾಡ್ಯಾಂತ್ಲ್ಯಾ ಮ್ಯಾಕ್ಸಿಂ ಪಿರೇರಾ ಹಾಚ್ಯಾ ಭುರ್ಗ್ಯಾಚ್ಯಾ ಜಲ್ಮಾದಿಸಾ ಸಂದರ್ಭಿಂ ಕುಟ್ಮಾಚಾನಿಂ ಸರ್ವಾಂಕ್ ಕಾಫಿ ಪಳಾರಾಚಿ ವ್ಯವಸ್ಥಾ ಕೆಲ್ಲಿ.